Хөвсгөл аймгийн Хүүхдийн ордон одоогоор шатар, уран нугаралт, гар зураг, англи хэл, хөгжим, оюун ухааны чиглэлийн нийт 15 төрлийн дугуйланд 650 хүүхэд хамрагдаж байна. М.Эрдэнэсувд багштай Монголын оюун ухааны академийн суралцагч хүүхдүүд "Оюуны наадам-2024" 6 төрөлт наадмын Түргэн бодолтын аварга шалгаруулах 9 дэх удаагийн тэмцээн амжилттай оролцлоо. Тус тэмцээнд Түргэн бодолтын 10 тамирчин оролцож 8-аас доош, 9-өөс дээш гэсэн 2 насны ангилалд Нийлбэр, Үржвэр, Хүн хуанли, Флаш анзан гэсэн 4 төрлөөр шилдгүүдтэй өрсөлдөн 3 медалийн эзэд боллоо. Үүнд: 8-аас доош нас нийлбэр төрөлд Ж.Танан хүрэл медаль, Ж.Танан, Г.Өнөбилэг, Б.Бат-Энэрэл нар топ, 9-өөс дээш нас Флаш анзан төрөлд Г.Ган-очир мөнгөн медаль, Хүн хуанли төрөлд Г.Ган-очир хүрэл медаль, Х.Ууганбаяр, Б.Заяабадрах тус тус хүртсэн. 2023-2024 оны Улсын чансаанд тогтмол оролцож чансаагаараа тэргүүлсэн нас насны ангиллын 130 гаруй шилдэг тамирчдын өрсөлдөөнөөс "Khuvsgul клуб"-ийн 2 тамирчин хүүхэд 3 медалийг авчирч медалийн буухиаг үргэлжлүүлж чадсан байна.

Олон улсын Хүүхдийн эрхийг хамгаалах өдрийг угтан хүүхдийн эрх, хүүхэд хамгааллын талаарх мэдээлэл, мэдлэгийг түгээж цагийг эрүүл, үр бүтээлтэй өнгөрүүлэхэд чиглэсэн “Хүүхдийн ертөнц” хүүхдийн эрхийн алхалтыг 2024 оны 05 дугаар сарын 31-ний өдөр зохион байгуулагдлаа. Уг арга хэмжээг аймгийн Хүүхэд, гэр бүлийн хөгжил, хамгааллын газар болон Явган алхалтын холбоо, Эрүүл мэндийн газар, Хөгжлийн бэрхшээлтэй хүний хөгжлийн төв хамтран зохион байгууллаа. Алхалт Чингүнжавын талбайгаас гараагаа эхлүүлж, Соёмбо цогцолборт барианд орсон. Арга хэмжээний нээлтэд аймгийн Хүүхэд, гэр бүлийн хөгжил, хамгааллын газрын дарга Ч.Дашбаяр, ЯАХолбооны тэргүүлэгч Б.Анхбаяр нар оролцож, алхалтын гарааг эхлүүлэв. Тус алхалтад агентлаг, байгууллагын дэргэдэх “Эцэг, эхийн зөвлөл”-ийн гишүүд болон иргэд сайн дураараа нэгдэн 100 орчим хүн хамрагдав. Оролцогчдод алхангаа эрүүл мэнддээ хөрөнгө оруулалт хийхийн зэрэгцээ, хүүхдийн эрхийг хангах, аливаа эрсдэлээс урьдчилан сэргийлэх, хамгаалахад гэр бүл, эцэг, эхчүүдийн үүрэг, хариуцлагыг нэмэгдүүлэх шаардлагатай талаарх мэдээлэл өгсөн. Мөн “Эрүүл мэнд”, “Танин мэдэхүй”, “Хөгжлийн өртөө” зэрэг 3 өртөөгөөр аялж, хэрэгцээт мэдээ, мэдээллийг олж авсан. Өртөө бүрт оролцогч нарт зориулсан тусгайлан бэлтгэсэн мэдээлэл, зөвлөгөөг өгч ажиллалаа. Үүнд: “Эрүүл мэндийн өртөө”- өөр дамжуулан аймгийн ЭМГ-ийн мэргэжилтнүүд алхалтын ач тус, өглөөний цайны талаарх мэдээллийг өгч, өглөөний цайны булангаар зочлуулав. “Танин мэдэхүйн өртөө”-өөр дамжуулан хүүхэд хамгааллын тухай хуулийн шинэчилсэн найруулгын талаарх мэдээллийг өгсөн. Мөн аймгийн Хөгжлийн бэрхшээлтэй хүний хөгжлийн төвийн дэргэдэх тусгай хэрэгцээт хүүхдүүдийн гар урлалын үзэсгэлэнтэй оролцогчид танилцаж, 12 бүтээлийн худалдан авалт хийсэн. “Хөгжлийн өртөө”-өөр дамжуулан аймгийн Хүүхэд, гэр бүлийн хөгжил, хамгааллын газрын мэргэжилтнүүд алхалтын бариа болох Соёмбо цогцолборт оролцогчдод дасгал хийлгүүлж, хөгжөөнт тоглоом тоглуулан, хүүхдийн эрх, хамгаалалтай холбоотой асуултуудаар тэдний мэдлэгийг дүгнэсэн. “Хүүхдийн ертөнц” хүүхдийн эрхийн алхалтад оролцогчид дараах зүйлийг иргэд, олон нийтэд уриаллаа. 1. Хүүхдийн эрхийг дээдлэн, гэр бүлдээ өдөр бүр чанартай цаг гаргадаг байх. 2. Эцэг, эх, асран хамгаалагч, иргэд олон нийт байгууллагууд 06 дугаар сарын 01- ний өдрөөс эхлэн “Гэртээ эрт харья” аянд нэгдэж, хүүхдийг эрсдэлт нөхцөлд өртөхөөс урьдчилан сэргийлж, хуулиар хүлээсэн үүрэг хариуцлагаа нэмэгдүүлэх. 3. Байгууллага бүр хүүхдэд ээлтэй хүүхэд хамгааллын бодлого, журмыг батлан мөрдөх.

Хөвсгөл аймгийн ХГБХХГ-ын дэргэдэх Хүүхдийн ордонд 13 төрлийн дугуйлан хичээллэдэг. Тэдгээрийн нэг нь 2021 оноос хичээллэж эхэлсэн, Ч.Нямдаваа багшийн удирдсан “Хөх Монгол” шатрын дугуйлан юм. Уг дугуйлангийн суралцагч Нямдаваагийн Аз-Эрдэнэ охин Өмнөд америкийн Перу улсад зохиогдсон сурагчдын дэлхийн аварга шалгаруулах тэмцээнд амжилттай оролцож түрүүллээ. Н.Аз-Эрдэнэ уг тэмцээний бүх насны ангилалд оролцсон тамирчин хүүхдүүдээс цорын ганц бүтэн оноогоо авч түрүүлсэн тамирчинаар тодорлоо. Мөн рапид төрөлд нь 9 өөс 9 хожиж түрүүлсэн. Блиц төрөлд 8 хожиж түрүүлсэн байна. Ийнхүү Монголын баг тамирчдаас ганцаараа 3 алтан медаль хүртжээ. Дэлхийн аварга Н.Аз-Эрдэнэ охиндоо болон дасгалжуулагч багш Ч.Нямдаваадаа баяр хүргэе ээ. Хоймор нутгийн хүүхэд багачуудын амжилтын буухиа үргэлжилсээр…

Хүүхэд багачуудад дуулах ур чадвар олгох, Монгол эстрадын дууны урын санг баяжуулах, ирээдүйн эстрадын авьяаслаг дуучныг төрүүлэх зорилгоор “БИ ЭСТРАДЫН ДУУЧИН-2024” гоцлол дууны 19 дэх удаагийн Улсын уралдаан зохион байгуулагдлаа. Уралдаанд 14 аймаг, 6 дүүргийн нийт 75 сурагч 4 насны ангиллаар дуулах авьяас ур чадвараа сорин өрсөлджээ. Ерөнхий шүүгчээр СУИС-ийн хүндэт профессор МУГЖ Ч.Насантогтох, шүүгчээр СТА Улсын филармоны дуучин Насанбуян, СТА Нацагдорж ажилласан байна. Хөвсгөл аймгаас тус наадамд оролцсон хүүхдүүд дараах амжилтыг гаргасан. Үүнд: Мөрөн сумын “Нархан” VIII цэцэрлэгийн суралцагч Нямсүрэн Нандинхүсэл “Авхаалжтай дууч”-аар шалгарч, ЦОМ, ӨРГӨМЖЛӨЛ, мөнгөн шагнал “Дэлгэрмөрөн” цогцолбор сургуулийн Адилбиш Балжинням “ЦОВОО ДУУЧ”-аар шалгарч, ЦОМ, ӨРГӨМЖЛӨЛ, мөнгөн шагнал Шилдэг багшаар Мөрөн сумын “Нархан” VIII цэцэрлэгийн дуу хөгжмийн багш Д.Бямба нар тус тус шалгарсан байна. Бэлтгэсэн багш нар болон хүүхдийнхээ авьяасыг хөгжүүлж хамтран ажилласан эцэг, эхчүүд та бүхэнд талархал илэрхийлье. Та бүхэндээ халуун баяр хүргэе.

Өсвөрийн яруу найрагчдын “Хүрэл тулга” наадам 2 жилд 1 удаа зохион байгуулагддаг. Өнөө жил аймгийн наадамд 120 гаруй сурагч оролцож, Титэм ЕБС-ийн сурагч Э.Бадамзул, ДМЦС-ийн сурагч Б.Намуун нар шалгаран улсад оролцсон. Дээрх сурагчид улсад амжилттай оролцож, Э.Бадамзул дунд насны ангилалд Гранпри, ахлах насны ангилалд Б.Намуун 1-р байрын шагнал тус тус хүртлээ. Сүүлийн үед уг наадмаас гранпри болон тэргүүн байрын шагнал хүртээгүй бөгөөд авьяаслаг охид маань бахархам амжилтыг гаргалаа. Хүүхдийн хөгжлийг дэмжин хамтран ажиллагч аймгийн ЗДТГ, ХДТ, МУСГЗ Д.Сүрэнжав агсны ар гэр, аймгийн Нийтийн номын сангийн хамт олонд талархал илэрхийлье.

“Хөх сувд 2024” Олон улсын мөсний баяр 2024 оны 03 дугаар сарын 02, 03-ны өдрүүдэд Хөвсгөл аймгийн Хатгал тосгонд зохион байгуулагдлаа. Тус арга хэмжээний хүрээнд аймгийн Хүүхэд, гэр бүлийн хөгжил, хамгааллын газар “Авхаалж-Эрч хүч” мөсний волейболын тэмцээнийг 6 дахь жилдээ зохион байгуулав. Уг тэмцээний зорилго нь залуучуудын чөлөөт цагаа зөв боловсон өнгөрүүлэх нөхцөлийг бүрдүүлж, тэдний эерэг хандлага, идэвхтэй хамтын ажиллагааг дэмжихэд чиглэгдсэн. Тэмцээнд Сэлэнгэ, Завхан, Дархан, Булган, Өмнөговь, Төв зэрэг 6 аймаг, Хөвсгөл аймгийн 7 сумын нийт 30 багийн 200 гаруй залуучууд оролцож, авхаалж самбаа, эрч хүчээ сорьж, хөгжилдлөө. Тэмцээний шилдгээр шалгарсан баг тамирчид: 1. О.Бямбацэрэн ахлагчтай Өмнөговь аймгийн “Ёл” баг тэргүүн байр 2. Б.Ганхуяг ахлагчтай Сэлэнгэ аймгийн “Орхон” баг дэд байр 3. М.Төрболд ахлагчтай Хөвсгөл аймгийн “Тулгын гурав” баг гутгаар байр 4. С.Одонтуяа ахлагчтай Сэлэнгэ аймгийн “Эрдмийн элч” баг тусгай байр 5. Б.Мягмарсүрэн ахлагчтай Хөвсгөл аймгийн “Далай” баг тусгай байрт шалгарлаа. Тус тэмцээнд оролцогч, үзэгч сонирхогч иргэд, залуучуудын тоо улам нэмэгдэж хүрээгээ тэлсээр байна.

Хөвсгөл аймаг 2024 оныг “Хүүхдийн хөгжил, хамгааллыг дэмжих жил” болгон зарласан. Хүүхдийн хөгжил, хамгаалалтай холбоотой суурь үзүүлэлт, салбаруудын оролцоо, хамтын ажиллагааг сайжруулж, хүүхдэд чиглэсэн ажил, үйлчилгээний чанар, үр нөлөөг нэмэгдүүлэх, тэдний аж байдалд ахиц өөрчлөлт гаргах зорилго дэвшүүлж, 4 зорилтын хүрээнд 74 арга хэмжээ хэрэгжүүлнэ. Нэрлэсэн жилийн ажлын хүрээнд хүүхдэд ээлтэй орчин, нөхцөлийг бүрдүүлэх, хүүхдийн хөгжлийг дэмжих үйлчилгээ, хамгааллын хариу үйлчилгээг сайжруулах чиглэлд 5,4 тэр бум төгрөг зарцуулж, үр дүнг тооцно. Нэрлэсэн жилд хэрэгжүүлэх төлөвлөгөөг сум, агентлаг байгууллагын удирдлагуудад танилцуулж, хүүхэд, багачуудынхаа хамтаар өнөөдөр нээлтээ хийлээ.

Сургуулийн өмнөх насны хүүхдэд бүжгийн урлагийг таниулан тэдний хөдөлгөөний эвсэл, гоо зүйн мэдрэмж, хөгжмийн ритм, сонсгол, бүжиглэх авьяасыг хөгжүүлэх, үндэсний өв соёлоос суралцуулах зорилготой “ШУВУУХАЙ” Монгол бүжгийн улсын наадам 2024 оны 02 дугаар сарын 24-ний өдөр Монголын Хүүхдийн Ордонд зохион байгуулагдлаа. Наадамд Хөвсгөл аймгаас шалгаран Мөрөн сумын "Нархан" VIII цэцэрлэгийн "Хугашхан" хамтлаг Тайгын үрс бүжгээр оролцож, тусгай байр буюу 4-р байр эзлэн Монголын Хүүхдийн ордны нэрэмжит "Эрдэм"хүрэл медалиар шагнууллаа. Авьяаслаг бяцхан шавь нараа дэмжиж наадамд амжилттай оролцуулсан Мөрөн сумын "Нархан" VIII цэцэрлэгийн удирдлага, багш нар, бүжгийг дэглэсэн залуу уран бүтээлч Choijav Ariuka болон эцэг, эхчүүддээ талархал илэрхийлье.

Хүүхэд, өсвөр үеийнхний төсөөлөн зохион бүтээх чадварыг дэмжих, чөлөөт сэтгэлгээ, гоо зүй, авьяас чадварыг хөгжүүлэх, мэргэжлийн чиг баримжаа олгох зорилготой "Үнсгэлжин-2023" наадам амжилттай зохион байгуулагдлаа. Уралдаанд Мөрөн сумын ЭДЦС, ДМЦС, Титэм, Мөрөн Гурван-Эрдэнэ, Сод-Эрдэм, Ирээдүй XXI зуун, Авьяас, Нутгийн аваргууд ерөнхий боловсролын сургууль, Арбулаг, Бүрэнтогтох, Их-Уул, Жаргалант, Тариалан, Төмөрбулаг, Рашаант, Баянзүрх, Тосонцэнгэл сумдын ерөнхий боловсролын 17 сургуулийн 300 гаруй загвар зохион бүтээгч, загвар өмсөгч хүүхдүүд оролцож, авьяас чадвараа сорилоо. Уралдааны зохион байгуулалтыг хангаж, хамтран ажилласан ЭДЦС- ийн багш, сурагчид, "Алунгоо брэнд", "Үнсгэлжин" ТББ, дизайн технологийн багш нартаа гүн талархал илэрхийлж, ажлын өндөр амжилт хүсье.

Хөвсгөл аймгийн Хүүхдийн XII чуулган 2023 оны 11 дүгээр сарын 28,29-нд зохион байгуулагдана. Чуулганаар хүүхдийн өмнө тулгамдаж буй асуудлыг шийдвэр гаргах түвшинд танилцуулж, хэлэлцүүлэн, хүүхдийн саналыг тусгасан шийдвэрийг гаргуулна. ИЙМД ХҮҮХДҮҮД ТА БҮХНИЙ ӨМНӨ ЯМАР АСУУДАЛ ТУЛГАМДАЖ БАЙГААГ МЭДЭХ ЗОРИЛГООР "НАДАД ХЭЛЭХ ҮГ БАЙНА" САНАЛ АСУУЛГЫГ АВЧ БАЙНА. ТА БҮХЭНД ИДЭВХТЭЙ ХАМРАГДААРАЙ.